ខ្លាញ់ជាអាហារមួយក្នុងចំណោមសារជាតិអាហារទាំង៦ប្រភេទ ដែលចាំបាច់ចំពោះរាងកាយ។ វាមានសារសំខាន់ដូចគ្នាជាមួយនឹងសារធាតុការបូអ៊ីដ្រាត និង ប្រូតេអ៊ីនផងដែរ។
ខ្លាញ់ផ្ដល់ថាមពលទ្វេដង បើប្រៀបធៀបជាមួយអាហារផ្សេងៗទៀត។ តាមធម្មតាខ្លាញ់មួយក្រាមនឹងផ្ដល់ថាមពល ៩គីឡូកាឡូរី។ខ្លាញ់ដែលគេជួបជាទូទៅមាននៅក្នុងប្រេងរុក្ខជាតិ និង ខ្លាញ់សត្វដែលវាផ្ដល់សារសំខាន់ចំពោះថាមពល។ ខ្លាញ់ជាប្រភេទប្រមូលផ្ដុំថាមពល។ រាងកាយតែងប្រមូលផ្ដុំថាមពលទាំងនេះទុកគ្មានការកំណត់បរិមាណទេ ដោយហេតុថា កោសិកាខ្លាញ់អាចពង្រីកខ្លួនបាន។ លើសពីនេះទៀត រាងកាយអាចបង្កើតកោសិកាខ្លាញ់ឡើងមកជាថ្មីដោយខ្លួនឯងផងដែរ ដើម្បីផ្ដល់ថាមពលដល់រាងកាយ។
អាស៊ីដខ្លាញ់ដែលបានមកពីការរំលាយខ្លាញ់ គឺជាប្រភពថាមពលដ៏សំខាន់ចំពោះសាច់ដុំទាំងក្នុងពេលសម្រាក និងខណៈពេលប្រកបកិច្ចការងារស្រាលៗ។
ខ្លាញ់ជួយឲ្យពោះឆ្អែត។ អាហារដែលមានខ្លាញ់នៅពេលបរិភោគហើយតែងស្ថិតនៅក្នុងក្រពះអាហារ យូរជាងអាហារប្រភេទការបូអ៊ីដ្រាត និង ប្រូតេអ៊ីន ដូច្នេះហើយទើបធ្វើឲ្យយើងមានអារម្មណ៍ឆ្អែតបានយូរជាង។
តាមការសិក្សាបានបង្ហាញថា ខ្លាញ់មានសារជាតិការពាររាងកាយ។ ជាលិកាក្នុងខ្លាញ់ដែលរួមផ្សំទៅដោយសារជាតិ«ត្រៃគ្លីស៊ើរៃ» មានតួនាទីជាអ្នកការពារអវយវៈផ្សេងៗ ដូចជាថ្លើម ក្រលៀន និង លំពែង។
ខ្លាញ់មានតួនាទីបញ្ជូនវីតាមីនដែលត្រូវការរំលាយខ្លាញ់ និង ក្រៅពីនេះ វាមានតួនាទីដឹកនាំវីតាមីនដែលរំលាយក្នុងខ្លាញ់គឺវីតាមីន A, D, E និង វីតាមីនK ទៅកាន់ពោះវៀន ហើយវាជួយក្នុងការស្រូបទាញសារជាតិទាំងនេះផង។
ក្រៅពីនេះ ខ្លាញ់នៅជួយឲ្យអាហារមានរសជាតិផងដែរ៕
គេហទំព័រសម្រាប់កូនខ្មែរ 