ពីមួយថ្ងៃទៅមួយថ្ងៃ អ្នកកើតជំងឺទឹកនោមផ្អែម មានកាន់តែច្រើនឡើងៗ ហើយមូលហេតុស្ទើរតែ១០០ភាគរយ បណ្ដាលមកពីការទទួលទានខុស ឬទទួលទានមិនបានត្រឹមត្រូវ។
នៅពេលដែលយើងពិនិត្យឃើញថា មានជំងឺទឹកនោមផ្អែម អ្នកជំងឺគ្រប់រូបត្រូវមើលថែទាំសុខភាពរបស់ខ្លួន ជាពិសេសលើសពេលធម្មតាទ្វេដង។ អ្វីដែលសំខាន់បំផុតនោះគឺ ការគ្រប់គ្រងកម្រិតជាតិស្ករមិនឲ្យឡើងខ្ពស់លើសកំណត់។
វិធីសាមញ្ញៗដែលគ្រប់គ្នាអាចជួយខ្លួនឯងបាននោះគឺការទទួលទាន អាហារដើម្បីសុខភាពហាត់ប្រាណឲ្យបានខ្ជាប់ខ្ជួន សម្រាកឲ្យបានគ្រប់គ្រាន់និងកុំតប់ប្រមល់។
ក្រៅពីនេះ វិធីបុរាណដូចជាការប្រើរុក្ខជាតិឱសថ ដែលមាននៅជុំវិញរបងផ្ទះ គឺជាជម្រើសមួយទៀតដែលអាចជួយបាន ព្រោះបើបែរត្រឡប់មើលទៅក្រោយនោះ អ្នកនឹងបានឃើញថា មនុស្សជំនាន់មុនបានយករុក្ខជាតិខ្លះដូចជា ស្វាយ ដែលជារុក្ខជាតិហូបផ្លែចំណាស់បំផុតនៅលើលោកមកប្រើសម្រាប់ព្យាបាល ជំងឺទឹកនោមផ្អែមតាំងពីដើមមក ដោយនាំយកស្លឹកស្វាយមកស្ងោរទឹកផឹក។ ចូរមើលរបៀបធ្វើទាំងអស់គ្នា៖
មុនដំបូងត្រូវរកស្លឹកស្វាយ១៣-១៦ សន្លឹកលាងឲ្យស្អាត។ បន្ទាប់មកយកទៅស្ងោរជាមួយទឹកស្អាតមួយចានគោមដោយកម្ដៅភ្លើងតិច ៗ ប្រមាណជាមួយម៉ោង។ នៅក្នុងកំឡុងពេលនោះបើសិនជាខះទឹកគឺអាចបន្ថែមទឹកជាបណ្ដើរៗ រួចហើយពន្លត់ភ្លើងទុកចោលនៅលើចង្ក្រានមួយយប់ពេលព្រឹកឡើងត្រងយក «តែ» ផឹកពេលពោះទំនេរជាប់ៗគ្នា ៣-៤ ថ្ងៃ ប៉ុន្តែត្រូវចៀសវាងអាហារដែលមានជាតិផ្អែមផងដែរ។
ការមើលថែអ្នកជំងឺទឹកនោមផ្អែម គួរមើលថែរាងកាយទាំងមួល ក្រៅពីធ្វើឲ្យរាងកាយត្រូវពឹងពាក់ថ្នាំកាន់តែតិច និង បន្ថយការកើតជំងឺទឹកនោមផ្អែមបានហើយនោះ សុខភាពទូទៅ និងគុណភាពជីវិតក៏នឹងល្អប្រសើរឡើងផងដែរ៕
Filed under: ព័ត៌មាន | Leave a Comment »
